कराड तालुक्यातील 7 स्वस्त धान्य दुकानांसह जिल्ह्यातील 26 दुकानांवर कारवाई 11 दुकानांचे परवाने रद्द तर 6 निलंबित
कराड तालुक्यातील सात स्वस्त धान्य दुकानांवर जिल्हा पुरवठा अधिकाऱ्यांनी कारवाईचा बडगा उभारला आहे.यामध्ये पाल पेंबर,गोटेवाडी,कोरिवळे,वहांगाव,कराड मुल्ला यांच्या सह पाच स्वस्त धान्य दुकानाचा परवाना कायमस्वरूपी रद्द करण्यात आलेला असून खराडे येथील परवाना निलंबित करण्यात आला असून मलकापूर येथील स्वस्त धान्य दुकानाची अनामत रक्कम जप्त केली तसेच गैर प्रकार न करण्याची सक्त ताकीद दिली आहे.
अनिल कदम
May 13, 2020
2748
सातारा/प्रतिनिधी
सातारा जिल्ह्यात एकूण 1679 स्वस्त धान्य दुकाने असून विविध स्वरुपाच्या तक्रारींच्या अनुषंगाने जिल्हा पुरवठा कार्यालयाने जिल्ह्यातील 26 स्वस्त धान्य दुकांनावर कारवाई करुन 11 दुकानदारांचे परवाने रद्द केले. 6 दुकानदारांचे परवाने निलंबित केले तर 3 दुकानांची संपूर्ण अनामत रक्कम जप्त केली आहे. 6 दुकानदारांकडून धान्याच्या गैरव्यवहाराची बाजारभावाने भरपाई वसुली करण्याचे आदेश देण्यात आले आहेत. तर उर्वरित काही दुकानदारांना गैरप्रकारांबाबत नोटीस देण्यात आली असल्याची माहिती जिल्हा पुरवठा अधिकारी स्नेहा किसवे-देवकाते यांनी दिली आहे.
यामध्ये लाभार्थी यांना विहीत परिणामापेक्षा कमी धान्य देणे, जादा दर आकारणे. काही दुकानदारांनी ग्राहक यादीमध्ये नाव असतानाही धान्य देण्यास नकार दिला आहे, अंत्योदय व प्राधान्य कार्डवरील ऑनलाईन नोंद असणाऱ्या व्यक्ती संख्येपेक्षा कमी सदस्यांचे धान्य वितरण केल्याची प्रकरणेही पुढे आलेली आहेत, तसेच विक्री साठा लेखे प्रत्यक्ष विक्री केलेल्या धान्याशी न जुळणे, दर्शनी भागात भावफलक व प्राप्त धान्य माहिती न लावणे, उध्दट वर्तणूक करणे, ग्राहक रजिस्टर अद्यावत न ठेवणे, लाभार्थ्यांना पावत्या न देणे इत्यादी बाबत पुरवठा विभागाकडील भरारी पथकामार्फत तपासणीच्यावेळी गैरप्रकार निर्दशनास आले आहेत. संवेदनशीलपणे व जबाबदारीने काम न करणाऱ्या स्वस्त धान्य दुकानदार यांच्यावर यापुढेही कार्यवाही सुरुच राहणार आहे, असेही जिल्हा पुरवठा अधिकारी स्नेहा किसवे-देवकाते यांनी सांगितले आहे.
